كفاية حدف طوب


بسم الله الرحمن الرحيم




قال الله تعالي :
{ واعتصموا بحبل الله جميعا ولا تفرقوا واذكروا نعمة الله عليكم إذ كنتم أعداء فألف بين قلوبكم فأصبحتم بنعمته إخوانا وكنتم على شفا حفرة من النار فأنقذكم منها كذلك يبين الله لكم آياته لعلكم تهتدون }



عن أبي موسى الأشعري رضي الله عنه قال: قال رسول الله صلى الله عليه وسلم : "المؤمن للمؤمن كالبنيان يَشُدُّ بعضُه بعضاً – وشبك بين أصابعه" متفق عليه.


طبعا كلنا عايشين الحالة التي تمرها بها مصر مع اختلاف افكارنا وتوجهاتنا

ولاحظت مناقشات كثيرة بين الشباب علي الفيس بوك وفي الشارع وفي الشغل عن راي كل واحد في اللي بيحصل

واللي هيحصل



فمنهم اللي بيقول ماحدش ينزل التحرير ومنهم بيقول لا لازم ننزل

منهم اللي بيقول ده خروج علي الحاكم ومنهم بيقول ده مطالب مشروعة

منهم بقول دي فتنة ومنهم بيقول دي مش فتنة



وللاسف المناقشات بتاخد شكل حاد وغير اخلاقي بالمارة



احب اقولهم كلهم كفاية حدف طوب بقي

بلاش نحدف بعض بالطوب


خليني اقول مثال صغير وبعدين اقول انا عايز اوصلكم ايه




مثلا احنا طلبة في كلية طب وفي عندنا مريض بورم خبيث في جسده واحنا لسه دكاترة علي اد حالنا

وعايزين نسعف المريض ده ونلحق قبل مالورم يقتله



فسألنا الدكاترة الكبار اللي بناخد عنهم الطب فانقسموا لفريقين


فريق قال نستأصل الورم من جسم المريض بشدة ونتخلص منه



وفريق قال لا احنا نتجنب الاستئصال والشدة لان ده ممكن يهيج الورم ويخليه يدخل علي الخلايا السليمة يموتها وبكده نبقي بنسرع موت المريض وخلينا نزود مناعة الخلايا السليمة بحيث تقدر تقاوم وتحاول تزيل هي الخلايا اللي فيها ورم


ففريق من الاطباء راحوا ماسكين الورم وفضلوا يشيدوا فيه يشدوا فيه طبعا أثر علي جسم المريض كله وعلي بعض الخلايا

والفريق التاني فضل يزود مناعة الخلايا السليمة




في المثال ده الكل اتفق ان فيه ورم خطير علي الجسد واختلفوا في طريقة العلاج بس مفيش فريق انكر علي الفريق التاني في طريقة علاجه يمكن لكل واحد تخوفات من طريقة الفريق المعاكس بس في الاخر كل واحد عمل وظيفة وقدروا يعالجوا المريض .المريض هو المهم



احنا كده .العلماء اللي بناخد عنهم العلم اختلفوا في طريقة معالجة الامة وكل فريق كان عنده وجهة نظر وادلة وبراهين علي صحة كلامه وتخوفات من الطريقة التانية




ومع ذلك ماينفعش ننكر علي حد خد طريقة للعلاج لمجرد ان احنا اخدنا راي حد من الفريق التاني


في الاخر احنا عندنا اشياء مشتركة لازم نتفق عليها ونعمل سويا علي حلها كل واحد يعمل في الطريق المناسب له




خلينا نتفق ان احنا بنعمل للدين وبنحب الدين

خلينا نتفق ان احنا بنحب مصر وبنعمل من اجل مصر

خلينا نتفق ان فيه ظلم وفيه فساد محتاج علاج

خلينا نتفق ان الناس بعيدة عن ربنا محتاجنها تقرب

خلينا نتفق ان فيه ناس بيوتها اتخربت وناس فلوسها خلصت ومحتاجين مساعدة

خلينا نتفق ان فيه جشع وظلم من التجار واستغلال

خلينا نتفق ان فيه رايات غير اسلامية ممكن تسيطر وتفرد هيمنتها علي الساحة

خلينا نتفق ان الدعوة ممكن تدخل نفق مظلم ومحتاجة تكاتف من كل الناس حتي تخرج منه بسلام

خلينا نتفق ان فيه اطماع داخلية وخارجية

خلينا نتفق ان فيه دول من مصلحتها الامة تفضل في ظلام والدين ينزع من الامة

خلينا نتفق ان الامة محتاجة الدعاء

خلينا نتفق ان احنا اخوة في الله

خلينا نتفق ان بيجمعنا حب في الله



وغيره وغيره






شوفتوا احنا متفقين في كم نقطة وكلها في مصلحة الدين ثم الامة

كفاية جدل وخلي اللي ربنا يسرله طريق يكمل فيه وادعي ان ربنا يهديه للحق

وحط ايدك في ايده في نقط الاتفاق وخلوا راية الاسلام عالية خفاقة



وخليك فطن واخلاقك عالية لو حد كانت مناقشته جدالية وحادة وحب ياخد النقاش لركن مظلم خليك انت فطن وحول النقاش من نقط خلاف لنقط اتفاق وادعوه انكم تعملوا مع بعض في هذه النقطة





شباب ده مش وقت خلافات وخناق ممكن احيانا تصل لحد القطيعة


شباب كفاية حدف بعض بالطوب

شباب كفاية حدف بعض بالطوب



اللهم يسر لهذه الامة امر رشدها

وارنا الحق حقاً وارزقنا اتباعه وارنا الباطل باطلاً وارزقنا اجتنابه

اللهم من اراد بالاسلام والمسلمين خيرا فوفقه لكل خير ومن اراد بالاسلام والمسلمين شراً فاجعل كيده في نحره


جزاكم الله خيرا

نسألكم الدعاء

محلوظة : هذا مجرد راي ممكن حد يتفق معي وممكن حد يختلف معي




من أروع ما قرأت بجد

أظن ان الموضوع دة جه في وقته

جزى الله خيرا كاتبه وناشره

اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه